Internasjonal festivalsommar for Handmade Films og Aninaut Studios
Handmade Films in Norwegian Woods og Aninaut Studios tar turen til høvevis Bucheon International Film Festival og In the Palace International Short Film Festival for å pitche denne sommaren.
Konseptbilete av det nervepirrande spenningsdramaet Kraken.
Kraken og Dødens motorvei til Sør-Korea
Produsent Einar Loftesnes i Handmade Films tar med seg Kraken og Dødens motorvei til NAFF Project Market under Bucheon International Film Festival i Sør-Korea.
Spelefilmane, som begge har Pål Øie som regissør, skal presenterast under merkelappen Nordic Genre Invasion Selections, der nye prosjekt frå Fredrik S. Hana og Saara Saarela også blir presenterte.
Både Kraken og Dødens motorvei har mottatt utviklingstilskot frå Vestnorsk filmsenter.
Teamet bak Tunnelen tar drama på vestlandsvegar inn i grøssarterritoriet med Dødens motorvei, medan Kraken gir oss eit spenningsdrama i monsterfilmgenren.
- Erfaren regissør og produsent med stor gjennomføringsevne og tidlegare suksessar i sjangeren bak seg, som har knytt til seg eit ungt talent på manussida, uttalar filmkonsulent Hanne-Lovise Skartveit om prosjektet Dødens motorvei.
Under festivalen skal også Marerittet visast, med Kjersti Elen Rasmussen i Handmade Films på manus og regi. Marerittet vart spelt inn i studio og på lokasjonar i Bergen våren 2021.
Filmer Forge gir regissør Thomas Smoor Isaksen og produsent Dag-Erik Hansen moglegheit til å presentere Mammuten for eit breitt internasjonalt publikum og profesjonelle i bransjen.
Aninaut Studios på In The Palace
Aninaut Studios deltar på In the Palace International Short Film Festival i Bulgaria med regissør Thomas Smoor Isaksen og produsent Dag-Erik Hansen. Dei skal der delta i pitchekonkurransen for kortfilm, Filmer Forge, der dei kan vinne 7500 euro til prosjektet Mammuten, ein gripande kortfilm som tar publikum med på ei emosjonell reise gjennom forteljingar om tap, motgang og håp.
I tillegg skal Aninaut også vise kortfilmen Drømmen om Hawaii, som ein del av animasjonsprogrammet under festivalen. Animasjonsfilmen problematiserer overforbruket av plast som i dag har blitt eit problem for miljøet og økosystemet i hav- og kystområdet, og har så langt kome inn på 66 filmfestivalar og vunne 18 prisar. Filmen er med i kategorien beste animerte kortfilm, og vinnaren blir kvalifisert til å bli vurdert til Oscar- og GOYA-nominasjon.
- Vi er glade for å bidra til at Aninaut Studios kjem seg ut i verda og styrkar sin posisjon for vidare finansiering, seier Stine Tveten, dagleg leiar.
Mammuten og Drømmen om Hawaii har mottatt økonomisk støtte frå Møre og Romsdal fylkeskommune og Vestnorsk filmsenter.
