Det spirer og gror i heile regionen
360 bitar av Johannes Stjärna Nilsson er ein personleg film om å sjå mønster og samanhengar, og om ein lengsel etter å sjå heile bilete.
21. juni 2023 vedtok Vestnorsk filmsenter sitt styre innstillinga der 15 film- og serieprosjekt blir tildelte midlar.
- Vi støttar i denne runden nye prosjekt frå selskap i Molde, Ålesund, Florø, Bergen og Bjørnafjorden, og er glade for å sjå at det spirer og gror i heile regionen, seier dagleg leiar Stine Tveten ved Vestnorsk filmsenter.
Blant prosjekta som har mottatt midlar finn vi ein samproduksjon med Cannes-nominerte Johannes Stjärna Nilsson og den første umesamiske animasjonsfilmen, Gutnabađos.
Aninaut Studios, Kompendium og Aldeles går i produksjon, og Ilana Pinker og co i DLS AS har mottatt støtte til utvikling av ein dramaserie som vil bringe fram ei viktig og tidsaktuell historie frå regionen vår.
Thorvald Nilsen etablerte tidlegare i år Indie Film Bergen, og mottar denne runden utviklingsstøtte til dokumentarfilmen Løvene ved elven Tigris frå regissør Zaradasht Ahmed.
Samproduksjon med Cannes-nominerte Stjärna Nilsson
Göteborg-regissør Johannes Stjärna Nilsson går i samproduksjon med Elin Sander og Aldeles AS med filmen 360 bitar, ein humoristisk og livsglad dokumentar om historia bak eit puslespelbilete. Denne samproduksjonen er starten på eit samarbeid mellom to kreative filmselskap frå norsk og svensk vestkyst.
Stjärna Nilsson er ikkje ukjend med Vestlandet, og har tidlegare spelt inn kortfilmen The Bear i regionen, ein vakker og sår film om einsemd, identitet og det å føle seg utanfor i det moderne samfunnet.
Aninaut, Kompendium og Aldeles går i produksjon
Aldeles AS går også i produksjon med Vi som solgte landet frå regissør Kieran Kolle. Dokumentaren gir oss ei poetisk skildring av korleis politiske avgjerder og «grønn kapitalisme» rokkar ved den norske folkesjela, og gradvis undergrev sosialdemokratiet sitt fundament.
Vi som solgte landet.
Aninaut Studios, som nyleg er tilbake frå festivaldeltaking, går i produksjon med animasjonsfilmen Mammuten. Filmen blandar leiken animasjon og scener med skodespelarar i spektakulær sunnmørsk natur.
Regissør Hanne Andersen og Kompendium går i produksjon med kortfilmen Syner, ei sår, ærleg og visuelt slåande forteljing om sosial angst. I filmen møter me ei kvinne som vandrar gjennom byen ein vanleg dag, kor ho i forsøk på å trasse den sosiale angsten hennar blir møtt med ei verd der fantasi og verkelegheit blir blanda. Med enkle og tydelege verkemiddel viser dei både angsten sin irrasjonalitet og makta han har over sinnet.
Pinker og co med dramaserie
DLS AS har fått tildeling til utvikling av ein dramaserie som vil bringe fram ei intens, viktig og tidsaktuell historie frå regionen vår, men på noverande tidspunkt kan vi ikkje røpe fleire detaljar.
- Med denne støtta på plass, ser vi ut til å vere godt posisjonerte for å sette skikkeleg fart på finansieringsarbeidet vårt innan utløpet av året, uttalar produsent Ilana Pinker om støtta frå Vestnorsk filmsenter.
- Å motta støtte frå Vestnorsk er ikkje berre ein uvurderleg ressurs for dette arbeidet, men det fungerer også som ei solid bekrefting på at dette prosjektet resonnerer med nokre av dei mest framtredande fagmiljøa, som også ser dette som ei historie som skildrar tema av betydeleg offentleg interesse.
Ilana Pinker, produsent
Umesamisk animasjonsfilm
Vestnorsk filmsenter har denne runden også tildelt støtte til Rett Vest til utvikling av den animerte kortfilmen Gutnabađos. Dette er den første umesamiske animasjonsfilmen, og den skal bli laga i Bergen. Kortfilmen er basert på Isak Mikkel Saba sine skildringar av folkeeventyret med same namn.
- Gutnabađos er den samiske Askepott. I denne kortfilmen, som bygger på ein lang eventyrtradisjon, kjempar ho mot kongens miljøkriminalitet, uttalar Lasse Gallefoss om prosjektet.
Thorvald Nilsen i gang med Indie Film Bergen
Thorvald Nilsen etablerte tidlegare i år Indie Film Bergen, i samarbeid med produsent Carsten Aanonsen hos Indie Film.
- Ambisjonen er å skape ein spanande heim for dei sterkaste historieforteljarane og prosjekta i verdas beste by, Bergen, uttalte Nilsen til Rushprint.
Indie Film Bergen mottar denne runden utviklingsstøtte til dokumentarfilmen Løvene ved elven Tigris frå regissør Zaradasht Ahmed.
- I ruinane etter den islamske stat bygger innbyggarane i Mosul opp liva sine. I ein formsterk dokumentar av internasjonalt format, viser den prisløna regissøren oss forteljingar om håp og framtidsoptimisme frå ein del av verda vi som regel møter i dystre nyheitsreportasjar, seier konsulent Lasse Gallefoss.
