Kortfilmvisning og prisutdeling hos BAKOM
5. september arrangerte BAKOM kortfilmvisning og prisutdeling på Cinemateket i Bergen for manus- og kortfilmkonkurransane denne sommaren, etterfølgt av filmtreff og opent hus.
- Tusen takk til alle som har levert bidrag til årets sommarkonkurranse! Det viktigaste vi kan gjere for å bli gode filmskaparar er å lage film. Skriv dei historiane de har lyst til å fortelje, samarbeid med nye menneske og lån utstyr frå BAKOM, sa jurymedlem Mathilde Meraki Ypsøy frå scena under prisutdelinga.
Det var visning av 6 bidrag frå kortfilmkonkurransen med tema Lett, og det var Ola Kvamsdal som stakk av med sigeren med kortfilmen Opplett.
- Idéen er tydeleg og god, og filmen er kompromisslaus i si gjennomføring. Med inspirasjon frå fortidas meistrar klarar han å gi ei kjensle av storbyen sin rytme, og kombinerer det flotte visuelle uttrykket og musikken til ei større eining, heiter det i juryen si grunngjeving.
Kortfilmjuryen bestod av Mathilde Meraki Ypsøy frå Vestnorsk filmsenter, produsent Thorvald Nilsen og regissør Ina Lerner Grevstad, og i følgje juryen var det stor variasjon i både form og tematikk i årets konkurranse.
Manuskonkurransen denne sommaren hadde tema Gru. Manusforfattar Vilde Eide, skodespelar Helge Alexander Forland og produsent Simon Nilsen deltok som manusjury, som kåra vinnaren Underliggende problem av Jonas Mørk blant dei 17 bidraga.
- Manuset vi har valt som vinnar, har ei unik og original tilnærming til temaet Gru, som fall i smak hos alle i juryen. Historia er effektivt fortald, samstundes som hovudkarakterens gru og sjarm skin fint gjennom i dialogen og plottet. Medan det er utallige måtar å oppleve gru på i livet, viser denne manusforfattaren ei annleis side av gru ved hjelp av humor, heiter det i jurygrunngjevinga.
- Gratulerer så mykje med gode bidrag i årets sommarkonkurransar, og stort til lukke til årets
vinnarar!
Sofie Vestad, avdelingsleiar i BAKOM
BAKOM er ein kreativ produksjonsverkstad for unge og nye i bransjen som vil lage film og spel, og blir drifta av Vestnorsk filmsenter med støtte frå Vestland fylkeskommune og Bergen kommune. På BAKOM kan du utforske ulike fagfelt og sjangrar, og øve deg god på det du trivst best med. Det er gratis medlemskap. BAKOM har diverse produksjonsutstyr for utlån, arbeidsstasjonar med relevant programvare og tilgang på møterom, filmverkstad, klipperom, datalab og visningsrom. Fasilitetane er tilgjengelege for medlemmane etter avtale med avdelingsleiar.
